Knattspyrna, Forsíðufrétt
Knattspyrnufélagið Víkingur hefur ráðið Ívar Orra Aronsson í starf Íþróttastjóra félagsins.
Ívar Orri Aronsson hefur verið ráðinn Íþróttastjóri Víkings og hefur hann nú þegar tekið til starfa. Ívar mun taka við flestum þeim verkefnum sem Fannar Helgi fráfarandi Íþróttastjóri hefur áður sinnt.
Ívar er mikill íþróttaáhugamaður og stuðningsmaður Víkings. Hann þekkir félagið vel, en hann æfði á sínum yngri árum knattspyrnu upp alla yngri flokka Víkings og hefur einnig haft samskipti við félagið í gegnum störf sín sem forstöðumaður félagsmiðstöðvarinnar Bústaðir.
Ég er gríðarlega spenntur að hefja störf hjá Víking. Þakklátur fyrir að fá tækifæri til að gefa af mér til míns félags og bætast í frábæran hóp starfsmanna, þjálfara og sjálfboðaliða sem starfa hjá félaginu.
Ívar er með BA próf í stjórnmálafræði og BA próf í tómstunda- og félagsmálafræði. Hann hefur undanfarin 14 ár starfað hjá Félagsmiðstöðinni Bústaðir og þar af síðustu fimm ár sem forstöðumaður hennar.
Við bjóðum Ívar innilega velkominn til félagsins!
