Knattspyrnudeild Víkings hefur ráðið Óskar Örn Hauksson sem styrktarþjálfara meistaraflokks karla. Óskar er menntaður íþróttafræðingur frá HR og útskrifaður úr ÍAK styrktarþjálfunámi frá Keili.
Óskar er leikjahæsti leikmaður efstu deildar karla frá upphafi en hann á samtals 19 tímabil í efstu deild og spilaði samtals 373 leiki og skoraði í þeim 88 mörk. Samtals á Óskar 23 ár í meistaraflokki og hefur spilað 709 leiki samtals og skorað í þeim 197 mörk.
„Það er ánægjulegt og spennandi fyrir félagið að hafa samið við Óskar Örn sem nýjan styrktarþjálfara. Óskar þarf ekki mikla kynningu en hann er einn besti leikmaður sem hefur spilað á Íslandi svo það er frábært að fá hann inn í teymið. Það hefur verið lítil hreyfing í þjálfarateyminu hjá okkur undanfarin ár og alltaf gott að fá nýjar raddir inn.“
„Ég er mjög spenntur fyrir því að taka við starfi styrktarþjálfara karlaliðs Víkings og starfa með frábæru þjálfarateymi félagsins. Liðið hefur stimplað sig inn sem eitt besta lið Íslandsögunnar þannig það er mikill heiður fyrir mig að fá tækifæri til að taka þátt í að viðhalda þeim frábæra árangri.“
Knattspyrnudeild Víkings býður Óskar Örn innilega velkominn til félagsins!
