Knattspyrna, Forsíðufrétt
Íslands- og bikarmeistarar Víkings hafa samið við varnarmanninn öfluga Oliver Ekroth, en hann kemur til félagsins frá Svíþjóð eftir að hafa leikið með Degerfors IF í Allsvenskan á síðasta tímabili.
Oliver er þrítugur miðvörður með mikla reynslu, en hann hefur leikið í efstu þremur deildum Svíþjóðar á sínum ferli sem leikmaður.
Arnar Gunnlaugsson þjálfari Víkings: „Ég er mjög ánægður með að hafa fengið Oliver. Það var leitað lengi að réttum leikmanni, ekki eingöngu réttum leikmanni fótboltalega séð heldur einnig réttum karakter sem er hungraður í að koma og hjálpa okkur í að verja báða titla og standa okkur vel í Evrópu. Oliver var fyrirliði í liði í Allsvenskan, var þrisvar sinnum í liði vikunnar á tímabilinu og fær góð meðmæli“.
Stjórn knattspyrnudeildar Víkings er afar ánægð með að hafa fengið Oliver til félagsins og er sannfærð um að hann muni reynast mikill liðsstyrkur á komandi tímabili.
