Helgina 16.-17.ágúst sl. héldu knattspyrnudeild Víkings og Petit barnavöruverslun sitt fjórða Petit Hamingjumót saman í Víkinni. Mótið er haldið fyrir yngstu iðkendur knattspyrnunnar en það voru yfir 2000 strákar og stelpur sem mættu á mótið og öttu kappi með liðunum sínum.
Árið í ár er fimmta árið í röð þar sem hluti af þátttökugjaldinu er látinn renna til góðgerðarmála. Síðastliðin ár hefur mótið t.d. styrkt BUGL, Ljónshjarta, Umhyggju og Gleym mér ei um 1.000.000 kr. Mótshaldarar velja ár hvert góðgerðarfélög/samtök sem eiga það sameiginlegt að starfa með eða fyrir börn.
Í ár var ákveðið að styrkja SKB – Styrktarfélag krabbameinssjúkra barna um 1.000.000 kr og mætti Dagný Guðmundsdóttir varaformaður SKB á mótið og tók við ávísuninni frá Ívari Orra Aronssyni, íþróttastjóra Víkings og Gunnari Þór Gunnarsyni eiganda Petit. SKB stendur Víkingi afar nærri þar sem Tómas Freyr, sonur framkvæmdarstjóra knattspyrnudeildar, hefur barist hetjulega við krabbamein síðan í október í fyrra.
