Knattspyrna, Forsíðufrétt
Handknattleiksdeild Víkings hefur samið við Daníel Ísak Gústafsson um að taka við sem aðstoðarþjálfari meistaraflokks karla. Daníel mun jafnframt stýra Víkingi 2 í 2. deild karla sem aðalþjálfari og annast þjálfun 4. flokks karla hjá félaginu. Að auki mun hann gegna hlutverki verkefnastjóra hjá barna- og unglingaráði félagsins í hlutastarfi, þar sem hann kemur að mótun og þróun á faglegu starfi yngri flokka innan handknattleiksdeildarinnar.
Daníel Ísak kemur með víðtæka reynslu úr þjálfun og leik, og hefur á undanförnum árum byggt upp gott orðspor sem metnaðarfullur og faglegur þjálfari. Hann bætist við metnaðarfullt þjálfarateymi meistaraflokks undir stjórn Aðalsteins Eyjólfssonar og mun gegna lykilhlutverki í áframhaldandi uppbyggingu félagsins á öllum stigum.
„Við erum gríðarlega ánægð að fá Daníel Ísak í þjálfarateymið. Hann hefur sýnt mikla fagmennsku og ástríðu fyrir þjálfun og þróun leikmanna. Að fá hann inn sem aðstoðarþjálfara meistaraflokks, leiðtoga í yngri flokkum og verkefnastjóra í barna- og unglingastarfinu styrkir okkar heildarstarf mjög mikið.“ – Aðalsteinn Eyjólfsson, þjálfari meistaraflokks karla og yfirmaður handknattleiksmála
„Ég er þakklátur fyrir traustið sem mér er sýnt hjá Víkingi og hlakka til að taka þátt í metnaðarfullu verkefni með meistaraflokki og að leggja mitt af mörkum í uppbyggingu ungra leikmanna. Þetta er félag með ríka sögu og skýra framtíðarsýn – og ég er spenntur fyrir því sem framundan er.“ – Daníel Ísak Gústafsson
