Forsíðufrétt, Handbolti
Knattspyrnufélagið Víkingur og Rangers hafa komist að samkomulagi um félagaskipti Telmu Ívarsdóttur frá Skotlandi í Hamingjuna.
Telma hóf knattspyrnuferilinn hjá Val á Reyðarfirði en byrjaði ung að spila með sameiginlegu liði Fjarðabyggðar. Hún lék sinn fyrsta meistaraflokksleik árið 2014, aðeins 15 ára gömul, og spilaði með liðinu í tvö ár eftir það. Árið 2016 gekk hún til liðs við Breiðablik. Þá hafði hún þegar leikið fjölda landsleikja með yngri landsliðum Íslands og lék sína fyrstu meistaraflokksleiki fyrir Breiðablik þá um vorið. Næstu ár safnaði hún dýrmætri reynslu í röð lánssamninga, fyrst hjá Grindavík í efstu deild árið 2017, síðan hjá Haukum í 1. deild árið 2018, Augnabliki í 1. deild árið 2019 og FH í efstu deild árið 2020.
Eftir að hafa snúið aftur til Breiðabliks festi hún sig í sessi sem aðalmarkvörður liðsins og lék með því þar til hún hélt í atvinnumennsku með Rangers í Skotlandi um mitt sumar 2025. Þaðan var hún síðan lánuð til Inter Mílanó vorið 2026, þar sem liðið átti í harðri baráttu um ítalska meistaratitilinn. Með Breiðabliki varð hún bikarmeistari árið 2021 og Íslandsmeistari árið 2024 og þá jafnframt valin besti markvörður Bestu deildarinnar. Hún lék jafnframt með liðinu framan af sumri 2025 þegar liðið tryggði sér bæði Íslandsmeistaratitilinn og bikarmeistaratitilinn um haustið. Á tíma sínum hjá Breiðabliki vann hún einnig Lengjubikarinn og Faxaflóamótið nokkrum sinnum.
Alls á Telma að baki 214 leiki með meistaraflokkum fyrrnefndra félaga, þar af 100 leiki í efstu deild og bikarkeppni. Hún á jafnframt að baki 38 landsleiki fyrir Ísland, þar af 12 með A-landsliðinu. Það má því öllum vera ljóst hve mikill fengur hún er fyrir Víkinga.
Vertu hjartanlega velkomin í Hamingjuna Telma ❤️🖤
