Knattspyrna, Forsíðufrétt
Gengið hefur verið frá ráðningu John Henry Andrews, sem þjálfara meistaraflokks kvenna til næstu tveggja ára.
John á glæstan feril með liðinu en tók við því í kjölfar slita á áralöngu samstarfi við HK haustið 2019. Á þeim tíma var liðið á ákveðnum byrjunarreit, enda hafði liðlega helmingur leikmanna HK/Víkings gengið til liðs við HK og fjöldi annarra horfið á braut. John hóf þá markvisst uppbyggingarstarf sem hefur með sigri í Lengjudeildinni nú skilað liðinu upp í Bestu deild. Hann var nálægt því takmarki fyrir ári en mætir nú til leiks með töluvert reynslumeira lið, sem sýndi það í sumar að það á fullt erindi á meðal þeirra bestu.
John hefur þegar skipað sér á bekk með sigursælustu þjálfurum kvennaliðs Víkings og forvera þess. Þó samanburður á árangri geti verið erfiður þegar lið flakka á milli deilda, þá segir 73% sigurhlutfall í leikjum liðins árs sína sögu, þar með taldir eru leikir liðsins á móti liðum úr Bestu deildinni á leið til sigurs í Mjólkurbikarnum 2023.
Það er Víkingum því mikið gleðiefni að geta kynnt John til áframhaldandi starfa á þeirri leið sem hann er, til frekari afreka með liðið.
Áfram Víkingur!
