Knattspyrna

Segja má að ákveðin tímamót hafi verið í sögu kvennaknattspyrnu hjá Knattspyrnufélaginu Víkingi þann 19. júní en þegar flautað var til leiks í fyrsta leik meistaraflokks kvenna á Íslandsmótinu í knattspyrnu, og um leið fyrsta heimaleik liðsins, frá árinu 1985.

Var það í fyrsta sinn frá því herrans ári sem kvennalið lék undir merki Víkings í Íslandsmóti, þ.e. þar sem leikið var í fallegu rauðröndóttu Víkingstreyjunni, en eins og kunnugt er lauk góðu samstarfi Víkings og HK um rekstur sameiginlegs meistaraflokks síðasta haust eftir að hafa staðið frá árinu 2001. Leikurinn fór fram í Víkinni og var gegn ÍA og endaði hann 1-1 en þess má geta að síðasti heimaleikur liðsins fór fram á malarvellinum í Hæðargarði. Íslandsmót kvenna í knattspyrnu var fyrst haldið árið 1972, en kvennalið Víkings hóf þátttöku árið 1981. Sumarið 1985 varð liðið efst í A-riðli annarrar deildarinnar og tryggði sæti í fyrstu deildinni að ári. Stjórn knattspyrnudeildar félagsins ákvað hins vegar að senda ekki lið til keppni í efstu deild árið eftir og var erfið fjárhagsstaða sögð ástæða ákvörðunarinnar.

Liðið leystist því upp og gengu flestir leikmenn þess til liðs við KR sem fékk þar á einu bretti sterkan hóp sem varð síðar sigursæll í búningi Vesturbæjarliðsins. Þar á meðal voru kempurnar Helena Ólafsdóttir, Guðlaug Jónsdóttir og Klara Bjartmarz, nú framkvæmdastjóri Knattspyrnusambands Íslands. Ekki sögðu þó allir leikmanna skilið við Víking heldur kepptu margar þeirra áfram fyrir hönd félagsins í handbolta og mynduðu ásamt fleirum það sem kalla má Gullaldarlið Víkings í kvennahandbolta sem varð Íslandsmeistari árin 1992, 1993 og 1994 og má þar nefna Ingu Láru Þórisdóttur, Heiðu Erlingsdóttur og Hjördísi Guðmundsdóttur.

104051765 10157205753208239 8959609017975443082 n

Grant Volterenforte2019 Macron Logo NEG 1
Skrá sig á póstlista Víkings.

 header object clear2 minna