Handbolti


Víkingar sóttu ÍBV heim laugardaginn 11. febrúar. Eyjapiltar eru yfirleitt erfiðir heim að sækja. Víkingar hafa t.d. ekki sótt stig til Eyja síðustu fjögur árin a.m.k. Það var hins vegar ekkert annað í stöðunni fyrir Víkinga en að spila til sigurs í þessum leik ef þeir ætluðu að vera með í toppbaráttunni


Stjarnan byrjaði heldur betur í leiknum og komst í 1-3. Stjörnupiltar eru sterkir líkamlega og hávaxnir þannig að þeir voru ekki árennilegir enda hafa þeir sett sér skýrt markmið fyrir veturinn að komast upp um deild. Gestur minnkaði muninn og Óttar jafnaði í 3-3. Stjarnan skoraði en Jói jafnaði aftur. Þá kom Hjálmar inn á við fögnuð áhorfenda en hann er kominn aftur til Víkinga eftir eins og hálfs árs fjarveru. Hann lét strax finna fyrir sér og kom Víkingum yfir með góðu marki af línunni. Línuspilið hefur verið veiki hlekkur Víkinga undanfarin misseri svo vonir eru bundnar við að það lagist með endurkomu Hjálmars. Stjarnan jafnar en Óttar nær aftur forystu fyrir Víkinga með góðu undirskoti. Stjarnan jafnar en Arnar skorar úr víti. Hjálmar skorar aftur af línunni og kemur Víkingum yfir og Egill nær síðan tveggja marka forystu. Stjarnan jafnar en Jói kemur Víkingum yfir á nýjan leik. Þannig gekk það áfram að Stjarnan jafnar en Hjálmar og síðan Jói skora og ná eins marks forystu aftur fyrir Víkinga. Þá kemur slakur kafli hjá Víkingum og Stjarnan nær forystu en Óttar jafnar leikinn. Stjarnan skoraði hins vegar þrjú síðustu mörk hálfleiksins og leiðddi 13-16 þegar liðin ganga til búningsklefa.


Það sama var uppi á teningnum í upphafi seinni hálfleiks. Stjarnan skoraði tvö fyrstu mörkin og er þá komin með fimm marka forystu. Þá skorar Gestur fínt mark úr horninu og síðan skorar Kiddi með góðu gegnumbroti. Stjarnan skorar en Arnar minnkar muninn. Stjarnan nær aftur fjögurra marka forystu og leiðir 16-20 þegar tíu mínútur eru af seinni hálfleik. Þá skorar Arnar úr víti og Gestur skorar svo úr hraðaupphlaupi, því fyrsta í hálfleiknum en ekki því síðasta. Á þessum tíma er vörn Víkinga farin að vinna mun betur saman og það skilar sér strax í að Stjarnan verður að taka erfiðari skot og sóknin er ekki eins samstillt og áður. Það leiðir af sér að hvert hraðaupphlaupið á fætur öðru dundi á Stjörnumönnum sem nýttust öll. Jói skoraði tvö mörk úr hraðaupphlaupum í röð, Hjálmar skoraði af línunni, Arnar úr víti og Jói úr hraðaupphlaupi og Víkingur var kominn með forystu 23-22 þegar hálfleikurinn var hálfnaður. Þá skorar Jói úr hraðaupphlaupi, svo Jónas, þá Lárus og síðan Jói aftur og staðan er orðin 27-23. Þá skorar Stjarnan en Víkingar svara með þremur mörkum frá Gesti og tveimur frá Arnari. Jónas kom Víkingum í 31-25, Gestur skoraði fínt mark úr horninu og Jói lauk leiknum með marki af dýrari gerðinni. Leikurinn endar með stórsigri Víkinga 33-27. Fögnuður strákanna var mikill í leikslok því einni af mörgum hindrunum var rutt úr vegi í baráttu næstu mánaða.


Liðið átti í heildina fínan leik. Öll vítaköst nýttust sem Víkingar fengu (Arnar) svo og öll hraðaupphlaupin. Einungis eitt dauðafæri sem Víkingar fengu fór í súginn. Þarna hefur orðið mikil framför frá fyrri leikjum þar sem færin voru kláruð af miklu meira öryggi en oft áður. Hjálmar styrkti liðið verulega í sókninni, skoraði góð mörk af öryggi og fiskaði víti. Síðan dregur hann til sín mikla orku úr liði andstæðinganna sem geta þá ekki varist öðrum sem skyldi. Siggi getur þá einbeitt sér að varnarleknum sem er hans sterka hlið. Markmennirnir stóðu sig vel. Halldór stóð í markinu stærstan hluta fyrri hálfleiks og varði átta skot. Stefán kom inná undir lok hálfleiksins og m.a. varði eitt vítakast. Hann stóð síðan í markinu í seinni hálfleik, varði yfir tíu skot, þar á meðal a.m.k. eitt vítakast. Þriðja vítakast Stjörnunnar fór einnig forgörðum en þá var líklega skotið framhjá. Vörnin fór að vinna virkilega saman þegar líða tók á leikinn sem skilaði bæði auðveldari leik fyrir markmanninn og skapaði einnig mörg fín hraðaupphlaup. Jói átti góðan leik, skoraði nokkur mörk með miklum sleggjum, nýtti hraðaupphlaupin vel og lauk góðum leik með sirkusmarki. Arnar átti fína innkomu eins og oft áður og sýndi mikilvægt öryggi í vítaköstunum. Gestur stendur alltaf fyrir sínu, sívinnandi og öruggur í hraðaupphlaupum. Tíu mörk komu úr hraðaupphlaupum sem gerðu í raun út um leikinn. Gott var að sjá Jón Hjálmarsson inni á vellinum í nokkrar mínútur undir lok leiksins en hann hefur verið að ná sér eftir fótbrot. Viðsnúningur Víkinga var ótrúlegur frá því að vera fimm mörkum undir í upphafi seinni hálfleiks og sigra svo með sex marka mun. Alls skoruðu tíu leikmenn í leiknum.


Áhorfendur á leiknum voru allnokkrir. Stjörnumenn voru þó í meirihluta á bekkjunum og er það ekki  í fyrsta sinn sem aðkomuliðið er fjölmennara en heimamenn á bekkunum í Víkinni. Það ætti að vera hverju félagi áhyggjuefni. Það verður því ekki hjá því komist að minnast á hvernig staðið er að því að vekja athygli á leiknum af hálfu þeirra sem það eiga að gera. Það á að vera metnaðarmál félagsins að gera heimavöllinn að áttunda manni í heimaleikjum. Ekki var sendur út fjöldapóstur á félagsmenn Víkinga því alla vega fékk undirritaður (Gunnlaugur Júlíusson) ekki einn slíkan. Það tekur svona eina mínútu að framkvæma það. Ekki eru hengdar upp auglýsingar í nærliggjandi verslunum. Það á að vera hluti af starfi þjálfara yngri flokkanna að mæta á leiki meistaraflokks og hvetja liðið. Eftir nokkur ár standa ungir iðkendur vonandi í sömu sporum og þurfa þá að fá sína hvatningu. Það æfir verulegur fjöldi barna og unglinga handbolta hjá Víkingi en afar fá þeirra sáust á leiknum. Það er greinilegt að þarna er mikið verk að vinna svo vel sé gert.

Þessir skoruðu mörkin:

Gestur-5

Óttar-3

Jói-9

Hjálmar-4

Arnar-6 (3v)

Egill-1

Kiddi-1

Jónas-2

Lalli-1

Siggi-1


Óhætt er að segja að það hafi eitthvað annað en festa og stöðugleiki einkennt stöðu handboltans hjá Víking á undanförnum árum. Núverandi vetur er sá fyrsti síðan Róbert tók við liðinu sem hann hefur ekki þurft að púsla saman nýju liði að stærstum hluta til í upphafi hverrar leiktíðar. Vorið 2010 fóru níu leikmenn frá félaginu og leiktíðina á eftir mynduðu strákarnir sem voru að koma upp úr 2. flokk uppistöðu liðsins. Liðið sýndi góðan stíganda í fyrravetur og skilaði því sem hægt var að búast við. Miklu munar að þurfa ekki að eyða upphafi leiktíðarinnar í að kynnast mörgum nýjum leikmönnum og láta leikmenn kynnast innbyrðis. Því er ákveðinn stöðugleiki undirstaða þeirrar framþróunar sem er nauðsynleg til að geta byggt ofan á það sem fyrir er og þokað málum áfram. Nokkrir strákar bættust við í haust sem eru góð viðbót við þá sem fyrir voru en kjarninn er sá sami og var í fyrra. Það er rétt að halda því til haga að einir sex leikmenn meistraflokks hafa alist upp hjá Víking gegnum alla yngri flokkana og hafa því spilað undir merkjum félagsins á annan áratug.


Róbert er sáttur við andann í hópnum og vilja leikmanna til að leggja sig fram. Róbert segist ekki þola að tapa og segir strákana hafa álíka viðhorf. Þeir hafi bæði náð góðum sigrum í haust en einnig hafa þeir tapað nokkrum leikjum með mjög litlum eða minnsta mun. Því skilur ekki mikið á milli þeirra og þeirra liða sem eru fyrir ofan þá í töflunni. Mótið er rétt hálfnað þannig að það eru nægir möguleikar til að rétta það af sem á hallaðist fyrir áramótin. Þó má segja að vitaskuld skiptir það máli að mati Róberts að yngri strákarnir hafa ekki komið inn í lið sem er skipað þeim eldri og reyndari mönnum nema að litlu leyti. Það gerir alt auðveldara að hafa slíkar fyrirmyndir þegar ungir leikmenn eru að stíga sín fyrstu skref í meistaraflokki. Strákunum var flestum hent út í djúpu laugina á haustið 2010 og því tekur það heldur lengri tíma en ella að skapa þann leikskilning og liðskúltúr sem nauðsynlegur er til að ná árangri.


Hópurinn hefur verið að taka eðlileg skref fram á við sem handboltamenn. Liðsandinn er góður og öllum hefur verið tekið vel í Víkinni. Róbert segist heyra það frá aðilum utan Víkings að mórallinn í liðinu og hjá félaginu þyki góður en slíkt skiptir ætíð máli.

Stígandinn í liðinu hefur verið jafn og þéttur undanfarin misseri. Varnarleikur liðsins og markvarsla er best í 1. deildinni ef marka má þann markafjölda sem liðið hefur fengið á sig. Á hinn bóginn vantar eilítið upp á markaskorið til að geta verið á toppnum. Vonir standa til að það lagist í síðari hluta mótsins þegar leikmenn koma til baka úr meislum.  Tvö til þrjú mörk til viðbótar í leik myndu skipta sköpum í keppni jafnra liða.

Það þarf að sinna mörgu þegar halda skal úti handboltaliði. Að mati Róberts hefur það verið veikleiki félagsins á liðnum árum að það hefur skort nægilega margar hendur til að vinna þau verk sem þarf að vinna til að hægt sé að halda úti handboltadeild með þokkalegri reisn. Efniviðurinn er til staðar en það vantar fleiri hendur til að rífa starfið upp og gera það auðveldara.

Fjárhagslegt umhverfi liða í neðri deild handboltans er erfitt. Það fór fram umræða á aðalfundi deildarinnar sl. vor um nauðsyn þess að ná saman hóp sem myndi einbeita sér að fjármálum deildarinnar. Deildin skuldar ekkert en tekjur eru litlar. Lítið sem ekkert hefur gerst í þessum málum fram síðan þá. Það setur starfinu vitaskuld ákveðnar skorður. Í umræðu um félagslega þáttinn má þó ekki gleyma þeim dyggu stoðum sem eru til staðar. Margir góðir drengir standa vaktina á leikjum og sinna tímavörslu og öðru því sem þarf til að undirbúa leik og sjá til þess að hann fari fram eftir settum reglum. Það mættu hins vegar vera fleiri á bekkjunum til að hvetja liðið.

Fjöldi iðkenda í handbolta hefur farið vaxandi innan félagsins á liðnum árum. Fjöldi iðkenda hefur farið vaxandi í yngri flokkunum. Hátt í 20 strákar eru nú í 2. flokk félagsins en þeir eru langflestir á yngsta ári. Því mun þeirra tími koma eftir eitt til tvö ár. Það er í raun og veru sama staðan og þeir strákar sem nú eru í meistaraflokki voru í á þeirra aldri en þeir voru flestir jafnaldra.

Róbert leggur mikið upp úr að leikmenn sýni liðinu og félaginu virðingu, búningi þess og hver öðrum sem liðsfélagar. Hann hefur sett ákveðnar reglur um ýmsa hluti hvað þetta varðar sem þóttu ef til vill nýstárlegar í upphafi en eru nú eins og hver annar sjálfsagður hlutur. Slík hugsun styrkir hópinn til lengdar og fær leikmenn til að hugsa á annan hátt um sig sem leikmann og um íþróttina sem slíka.


Róbert og  strákunum hlakkar til seinni hluta mótsins sem hefst í byrjun febrúar. Þeir eru ákveðnir að sýna að Víkingar séu sýnd veiði en ekki gefin. Ef liðið kemur jafn vel út úr hléinu í ár eins og það gerði á síðasta ári þá er engu að kvíða í þeim efnum. Það verður spennandi að fylgjast með hvernig þeim gengur í seinni hluta hinnar jöfnu og spennandi keppni 1. deildar á næstu tveimur mánuðum. Því má ekki gleyma að góður stuðningur áhorfenda er sem 8. maður á vellinum. Því er mikilvægt að Víkingar sýni liðinu þann stuðning sem eðlilegur og nauðsynlegur er á heimaleikjum.

Fyrsti leikur Víkinga að loknu hléi er við Stjörnuna í Víkinni föstudagskvöldið 3. febrúar kl. 19:30 n.k. Strákarnir vita að hver leikur skiptir mál ef sett markmið eiga að nást. Liðið kemur sterkara til leiks frá því sem frá var horfið fyrir jól því í fyrsta lagi er Jón Hjálmarsson farinn að æfa og spila aftur eftir meiðsli. Í öðru lagi hefur Víkingum bæst góður liðstyrkur sem kemur til með að styrkja línuspilið verulega.  Áhorfendur fá að sjá það á föstudagskvöldið hver það er. Það sækir enginn auðveld stig í Víkina í vetur.

Það sást strax í upphafi að hér yrði um hörku leik að ræða. Víkingar hófu leikinn af krafti og spiluðu vörnina þétt og ákveðið. Varnarvinna liðsins hefur lagt grunninn að góðum árangri liðsins í vetur. Halldór var traustur fyrir aftan vörnina og lagði síðan grunninn að góðum hraðaupphlaupum sem Gestur sá um að skila rétta leið í markið. Víkingar höfðu heldur frumkvæðið í fyrri hálfleik en aldrei skildi mikið milli liðanna. Víkingar höfðu tveggja marka forskot þegar örfáar sekúndur voru eftir af fyrri hálfleik. Stjörnumenn áttu skot í stöng og boltinn hrökk beint í hendur línumannsins sem skoraði á síðasta sekúndubroti leiksins. Svona heppni getur skipt máli þegar ekkert má bera útaf og það gerði það í þessum leik.

TVG ZIMSEN logo prufa2
Skrá sig á póstlista Víkings.

 header object clear2 minna